Almannavarnanefnd

Formaður nefndi að koma þurfi hópslysaáætlunum sem í gildi eru í sveitarfélaginu betur á framfæri. Að hægt sé að nálgast allar áætlanir á einum stað. Minnti á að fara þurfi reglulega yfir áætlanirnar með viðbragðsaðilum til að allir séu meðvitaðir um viðbrögð í neyð. Einar nefndi að gott væri að koma upp reglulegum æfingum í tenglsum við viðbrögð og tóku fundarmenn undir það. Jónas nefndi að ekki sé algengt að flugslysaáætlanir séu virkjaðar, mætti nýta þær betur sem hópslysaáætlanir utan flugvallar. Setja mætti upp hnapp á vef sveitarfélagsins þar sem farið er beint inná ýmsar áætlanir sem tilheyra viðbragðsaðilum í sveitarfélaginu. Bæjarstjóra falið að vinna að útfærslu á þessu með gæða- og upplýsingastjóra og formanni nefndarinnar.

Björgunarsveitin Kári í Öræfum hefur óskað eftir heimsókn almannavarnarnefndar eða fulltrúa hennar til að fara yfir málefni fjöldahjálpastöðvar í Hofgarði og reynslu frá síðustu nýtingar hennar. Einnig kynnti formaður að Vegagerðin hefur samið við Bsv.Kára um lokanir á vegum ef þarf vegna veðurs. Gerð tillaga að ferð miðvikudaginn í Öræfin 5. mars. Bæjarstjóra falið að bjóða fulltrúa úr stjórn Rauða krossins með.

Bréf frá Vegagerðinni lagt fram til kynningar. Þar kemur fram að viðræður hafa verið í gangi um að Vegagerðin, lögregla og slökkvilið geti farið um veginn um Almannaskarð ef þörf er á. Nefndin leggur áherslu á að þetta mál verði klárað fyrr en síðar til að tryggja öryggi vegfarenda.

Formaður greindi frá því að ákveðið hefur verið að halda vettvangsstjórnar námskeið á Kirkjubæjarklaustri í mars n.k. og kynnti möguleika á að senda fulltrúa á það námskeið. Einnig kom fram að möguleiki sé að fá námskeið á Höfn fyrir viðbragðsaðila hér. Fundarmenn kanna í sínum einingum hvort hægt sé að senda fulltrúa á Klaustur og láti formann vita sem fyrst ef af verður.