Almannavarnanefnd

Farið yfir minnisblað frá fundi nefndarinnar í Hofgarði 5. mars sl. Þar var ákveðið að kanna hvort til séu reglur um Fjöldahjálparstöðvar sem setja má upp í Hofgarði. Samkvæmt upplýsingum frá Maríönnu Jónsdóttur fráfarandi formanni Hornafjarðardeildar RKÍ er verið að endurskoða reglur RKÍ í Fjöldahjálparstöðvum. Ákveðið að bíða endurskoðaðra reglna og hvetja RKÍ deildina til að vinna áfram að málinu með Öræfingum og óska eftir námskeiði í neyðarvörnum fyrir svæðið. Einnig mikilvægt að hafa vesti til að auðkenna starfsfólk á staðnum. Einnig rætt um mikilvægi þess að hjálparaðilar hér á Höfn séu tilbúnir til að fara í Öræfin ef á þarf að halda.

Farið yfir ábendingar frá ferðaþjónustuaðilum í sýslunni varðandi hættuástand sem komið hefur upp bæði í fjörunni við Jökulsárlón og mikinn ágang í íshellaskoðanir þar sem aðilar sem þekkja ekki vel til svæðisins hafa farið ógætilega um með viðskiptavini sína. Rætt um ábyrgð og skyldur sveitarfélagsins og lögregluyfirvalda í þessum málum. Jón Garðar lagði til að settar verði upp áberandi merkingar þar sem við á og jafnvel bannaður aðgangur ef talið er að hætta sé á ferðum í samvinnu við Vatnajökulsþjóðgarð. Rætt um merkingar og fyrirmyndir frá öðrum stöðum.
Nefndin samþykkir að farið verði í viðræður við Vatnajökulsþjóðgarð um merkingar og /eða lokanir á slóðum við íshella og kannað hvernig merkingar eru t.d. í Reynisfjöru þar sem svipuð hætta er og við fjöruna við Jökulsárlón. Málinu vísað til starfsmanna.
Einnig rætt um að ferðaþjónustuaðilar hafa gert athugasemd við fréttaflutning á ábyrgð Landsbjargar vegna andláts í íshelli fyrr í vetur.
Hætta hefur einnig skapast í vetur vegna norðurljósaskoðanna. Nefndin bendir á hættu sem skapast við að bílar án ljósa séu á þjóðveginum.
Formanni nefndarinnar og bæjarstjóra falið að koma upplýsingum um hættur í sveitarfélaginu til ferðaþjónustuaðila sem gera út á svæðið.

Ábendingar frá lögreglunni um þá umferðahættu sem skapast við fjölfarna ferðamannastaði í sýslunni. Þar sem mikil umferð bíla, hjólandi og gangandi er á þröngum vegum. Sem dæmi má nefna mikla hættu við brúna yfir Jökulsá á Breiðamerkursandi og á vegarkafla milli Skaftafells og Freysnes.