Bæjarráð Hornafjarðar

Fundargerð hafnarstjórnar Hornafjarðar nr. 276 lögð fram.

Vegagerðin óskar eftir heimild fyrir efnistöku úr farvegi Nýgræðslukvíslar. Fyrirhugað umfang er 1.800 m3 og verður efnistakan á um 3500-4000 fm svæði. Vegagerðin er að ganga frá námu og loka henni, þessi efnistaka er hluti frágangsins á svæðinu.Minjastofnun gerir enga athugasemd.

Rúnar Þór Guðmundsson, fyrir hönd Fallstakkanafar ehf., skilaði inn lóðunum Silfurbraut 44 og Silfurbraut 46 þann 9. júlí 2025.

Rúnar Þór Guðmundsson, fyrir hönd Fallstakkanafar ehf., skilaði inn lóðinni Sandbakkavegur 5 þann 9. júlí 2025.

Óskað er eftir breytingu á deiliskipulagi á Breiðabólstaðartorfu í landi Gerðis í Suðursveit. Breytingin felur í sér að ný lóð Oddnýjarhúss verði skilgreind sem ný lóð G07 og verði heimilt að byggja eitt frístundahús á lóðinni.Búið er að kynna breytinguna fyrir nærliggjandi íbúum og eru undirskriftir í fylgigögnum. Engar athugasemdir bárust.

Vegagerðin óskar eftir framkvæmdaleyfi fyrir efnistöku úr farvegi Hrútár vegna endurbóta á Hringvegi. Gert er ráð fyrir að taka um 8000 m3 á um 8000 m2 í um 1 m lagi.

Sveinbjörn Imsland, fyrir hönd Imslands ehf., óskar eftir breytingu á fyrra erindi. Í því erindi var óskað eftir breytingu á deiliskipulagi tjaldsvæðis og íbúðarsvæðis við Fiskhól, sem bæjarráð samþykkti að grenndarkynna á fundi sínum þann 1. júlí sl. Breytingin á fyrra erindi felur í sér aðra útfærslu á lóðarmörkum.

Ólöf Gísladóttir óskar eftir að lóðin Álaugarey verði stækkuð að Krosseyrarvegi 23 og að þeim stað þar sem innkeyrslan byrjar.

Rarik ohf. óskar eftir framkvæmdaleyfi til að halda áfram með dreifikerfi hitaveitu í Óslandi. Fyrirhugað er að hefja vinnu um miðjan ágúst og klára fyrir október. Beðið er eftir umsögn Minjastofnunar.

Samkvæmt skilmálum deiliskipulags fyrir svæðið skal leggja byggingaráform fyrir umhverfis- og skipulagsnefnd og samþykkja í nefndinni áður en þær eru lagðar fyrir embætti byggingarfulltrúa. Umsækjandi, Staðarfjall ehf., óskar eftir frávikum frá skilmálum deiliskipulags er varða fjölda bílastæða. Skipulagið gerir ráð fyrir einu stæði fyrir hverja 65m² verslunar og þjónusturýmis. Óskað er eftir heimild fyrir samtals 96 stæði. Jafnframt er óskað eftir frávikum frá skilmálum deiliskipulags er varða uppbrot útveggja, en þar segir að húshliðar mega ekki vera lengri en 30m án uppbrots. Óskað er eftir heimild til að hafa í einu tilfelli húshlið 30,6m án uppbrots.

Á síðasta fundi fól bæjarráð sviðsstjóra mannvirkjasviðs að fara í samningaviðræður við Ísbyggingar ehf. Drög að verksamningi liggja nú fyrir ásamt mati fjármálastjóra á kostnaði verkefnisins. Samningsupphæð er 45.595.269 kr.

Lóðarhafi sækir um heimild til að hafa þakskyggni á húsi við Hagaleiru 1 óverulega út fyrir byggingarreit.

Á fundi þann 10. júní 2025 samþykkti bæjarráð að fara í verðfyrirspurnarferli vegna framkvæmda við upphækkaðar gönguþveranir á Fákaleiru. Frestur til að skila tilboðum var til kl. 13:00 á föstudaginn 4. júlí sl. Kostnaðaráætlun verkefnis var 3.649.120 kr. Tvö tilboð bárust í verkið og eru þau eftirfarandi:1. E.E. verktakar 4.546.696 kr. m.vsk.2. Gröfuþjónusta Olgeirs 8.853.400 kr. m.vsk.Lagt er til að bæjarráð samþykki tilboð E.E. verktaka.

Minnisblað sviðsstjóra mannvirkjasviðs um ósk um aukafjárveitingu vegna ráðgjafakostnaðar vegna uppsagnar sviðsstjóra umhverfis- og skipulagssviðs lagt fram.

Minnisblað byggingarfulltrúa, minnisblað sviðsstjóra fræðslu- og frístundasviðs ásamt minnisblaði fjármálastjóra lagt fram.

Erindi frá Sýslumanninum á Suðurlandi þar sem óskað er eftir umsögn við útgáfu á tækifærisleyfi vegna Graffíls, listahátíðar ungs fólks.

Erindi frá félagi sumarhúsaeigenda í Stafafellsfjöllum lagt fram. Óskað er eftir fjárstyrk að fjárhæð 10 milljónir króna frá Sveitarfélaginu Hornafirði til að tryggja uppsetningu farsímamasturs í Dalsnúpi, Þórisdal í Lóni.

Viðauki 6 vegna óskar um aukafjárveitingu vegna endurskoðunar á netumhverfi sveitarfélagsins að upphæð 1.845 m. kr. lagður fram. Viðbótarfjárheimildum verður mætt með lækkun á handbæru fé.

Viðauki 7 vegna óskar um aukafjárveitingu vegna viðbyggingar við Gáruna fyrir pressuvél og starfsmannaaðstöðu og vegna óskar un aukafjárveitingu fyrir ráðgjafakostnaði vegna breytinga á umhverfis- og skipulagssviði að upphæð 33,97. m. kr. lagður fram. Viðbótarfjárheimildum verður mætt með lækkun á handbæru fé og lántöku upp á 17,67 m. kr.

Slysavarnafélagið Landsbjörg hefur tekið þá ákvörðun að flýta endurnýjun á björgunarskipinu Ingibjörgu þar sem talið er að Hornafjörður sé ein af lykilstaðsetningum fyrir björgunarskip. Skipið kom til Hafnar 12. júlí sl. Óskað er eftir styrk frá sveitarfélaginu vegna fjármögnunar björgunarskipsins.

Til skoðunar er að meta kosti og galla við ólíkt rekstrarfyrirkomulag á framkvæmd við að byggja nýtt íþróttahús, framkvæmdir við eldra íþróttahús ásamt lagningu gervigrass og tartan hlaupabrautar á íþróttasvæðinu. Meðfylgjandi eru tvö minnisblöð sem hafa verið dregin saman fyrir okkur:1. Samantekt frá KPMG um valkosti vegna uppbyggingar íþróttamannvirkja2. Minnisblað frá fjármálastjóra þar sem gerð er grein fyrir áætluðum kostnaði við leið eitt, skv. samantekt KPMG um valkosti vegna uppbyggingar á íþróttamannvirkjum.

Sviðsstjóri stjórnsýslusviðs leggur fram minnisblað um umsóknir um störf á umhverfis- og framkvæmdasviði.

Nú hefur verið stigið mikilvægt skref í átt að aukinni viðbragðsgetu og öryggi í Öræfum með tilkynningu stjórnvalda um að framlengja fyrirkomulag bráðaviðbragðs í Öræfum og Suðursveit og stofna starfshóp um framtíðarfyrirkomulag öryggisinnviða á svæðinu. Sveitarfélagið fagnar þessari ákvörðun og lítur á hana sem viðurkenningu á þeim ábendingum og áskorunum sem við höfum ítrekað komið á framfæri. En nú þarf að hamra járnið meðan það er heitt og tryggja að verkefnið verði unnið af festu og með langtímasýn að leiðarljósi.Sveitarfélagið mun ráðstafa íbúð sveitarfélagsins í Hofi undir þá aðila sem sinna munu viðbragðshlutverki á svæðinu en einnig þarf þegar í stað að hefja leit að bráðabirgðahúsnæði til að hýsa tækjakost og búnað, þar á meðal sjúkrabíl.Mikilvægt er að sveitarfélagið, í samstarfi við haghafa, vinni að langtímasýn fyrir svæðið með hliðsjón af framtíðarþörfum og að þeirri sýn verði komið á framfæri við starfshópinn sem stofna á.

Sveitarfélaginu barst viðurkenning frá ríkislögmanni á bótaskyldu íslenska ríkisins vegna málsmeðferðar og rangrar niðurstöðu Innviðaráðuneytisins í úrskurðum á fyrri stigum málsins vegna kröfu um endurgreiðslu gatnagerðargjalda að Hagaleiru 11. Viðurkennt er í síðasta úrskurði Innviðaráðuneytisins í málinu að málsmeðferð sveitarfélagsins hafi á öllum stigum málsins verið samkvæmt lögum og reglum.

Þessu máli er bætt við 11.07.2025 kl. 14:06Skúli Ingólfsson óskar eftir heimild bæjarráðs til að framselja lóðarréttindi sín að Hagaleiru 1 til Björgvins Ingimundar Lúðvíkssonar og Sæunnar Maríu Borgþórsdóttur. Erindið er byggt á sérstökum aðstæðum í samræmi við 3. gr. reglna um úthlutun lóða frá 10. desember 2020, og vísast jafnframt til 3. mgr. 5. gr. núgildandi reglna um sama efni.