Fræðslu- og frístundanefnd

Jóhann Morávek skólastjóri Tónskóla Austur-Skaftafellssýslu tók á móti fræðslu- og frístundanefnd og fylgdi nefndinni um húsið. Til stendur að ráðast í endurbætur á Sindrabæ á næsta ári og verður það kærkomið eftir margra ára frestun. Starfsfólk Tónskólans er reiðubúið að færa sig og vinna nánast hvar sem er á meðan á framkvæmdum stendur.

Emil fylgdi fundargerðinni úr hlaði. Fræðslu- og frístundanefnd samþykkir fundargerðina.

Þessi stefnumótun hefur í för með sér breytingu á því fjármagni sem USÚ hefur til úthlutunar til aðildarfélaga en á móti kemur starfsmaður inn til að styðja við starf aðildarfélaganna. Stefnt er að átta starfsstöðum á landinu og verða tveir starfsmenn á hverri. Þessi breyting gengur ekki í gegn fyrr en næsta sumar og stefnt er að því að starfstöðvarnar hefji allar starfsemi í kringum mitt næsta ár. Mikilvægt er að líta á þessar breytingar sem tækifæri til að efla barna og ungmennastarf og efla íþróttalíf í héraði. Fulltrúar USÚ leggja áherslu á að íþróttahéruð hafi mikilvægu hlutverki að gegna og mikilvægt að nýta þau tækifæri sem gefast til hins ítrasta.

Fræðslu- og frístundanefnd gerir ekki athugasemd við mannréttindastefnuna sem slíka og fagnar því að hún sé komin fram. Bent var á orðalag á einum stað og mun formaður koma þeirri athugasemd til skila. Einnig var bent á að betra hefði verið að einhver frá stýrihópi um mannréttindastefnu hefði fylgt málinu eftir í nefndinni. Nefndin hvetur til þess að stefnan sé kynnt vel fyrir forstöðumönnum og starfsfólki sveitarfélagsins. Einnig hvetur nefndin til þess að gerð verði aðgerðaráætlun með stefnunni og hún kostnaðargreind þar sem þörf er á.

Fræðslu- og frístundanefnd gerir ekki athugasemd við málstefnuna en hvetur til þess að hún sé kynnt vel fyrir forstöðumönnum og starfsfólki sveitarfélagsins. Auk þess hvetur fræðslu- og frístundanefnd til þess að gerð verði áætlun um það hvernig á að virkja hana og að hún kostnaðargreind.

Fræðslu- og frístundanefnd gerir ekki athugasemd við aðgerðaráætlun Barnvæns sveitarfélags og óskar stýrihóp og starfsmanni til hamingju með verkið. Það er það mikilvægt að fylgja aðgerðaráætluninni vel eftir og leggja til það fjármagn sem þarf svo hægt verði að framfylgja henni.

Undirbúningur fyrir útboðið er langt kominn og mun Ríkiskaup nú taka við boltanum.

Þórgunnur fór yfir samantekt sem verið er að vinna varðandi atriði sem starfshópurinn telur mikilvæg. Framundan er að forgangsraða atriðum, kostnaðarmeta og leggja svo fram drög að lokaskýrslu starfshóps á næsta fundi nefndarinnar.

Fræðslu og frístundanefnd fór yfir málið og tengdi m.a. við mannréttindastefnuna sem var verið að samþykkja. Mikilvægt er að sveitarfélagið móti sér stefnu um það hvernig það ætlar að jafnréttismeta aðgerðir sínar.