Fræðslu- og tómstundanefnd

Fundarmenn mættu í Vöruhúsið og skoðuðu það undir leiðsögn Vilhjálms Magnússonar forstöðumanns. Leist þeim einstaklega vel á starfsemina og hugmyndafræði Vöruhússins um skapandi miðju.

Svafa Mjöll fór yfir skýrslu skólagarðanna og vinnuskólans. Ungmenni sem störfuðu þar í sumar voru 27 en 39 sumarið áður. Þrátt fyrir þessa fækkun gekk vel að vinna þau verkefni sem fyrir lágu. Fram kom að jarðvegur skólagarðanna er fullur af njólum og illgresi þrátt fyrir að þeir hafi verið tættir upp tvisvar sinnum í maí. Lagt er til að leggja skólagarðana niður en bjóða fjölskyldum upp á fjölskyldugróðurreiti á svæðinu fyrir neðan Hafnarbrautina við mjólkustöðina. Starfsmönnum falið að kanna kostnað við þessa framkvæmd.

Gunnar Ingi fór yfir rekstur og aðsókn að sundlauginni. Stakt gjald kr. 700 greiddu 14.382 manns á bilinu janúar til september í ár. Stakt gjald er nú kr.700. Gunnar Ingi leggur til að öll börn, eldri borgarar og öryrkjar fá frítt í sund, að stakt gjald verði hækkað í kr. 800- og að leiga á sundfötum og handklæðum verði haldið óbreyttu, kr. 650. Tillagan var samþykkt samhljóða og gjaldskráin 2016 var uppfærð í samræmi við það.

Rætt var um möguleikann á því að leigja sundlaugina út til hópa eftir lokun.

Snæfríður fór yfir skipulag um aukna samvinnu milli leikskólanna með 4 og 5 ára börnum. Skipulagt samstarf er á hverjum mánudegi auk samveru allra árganga í útiveru einu sinni í mánuði. Hún fór einnig yfir aukin samskipti starfsmanna leikskólanna. Fram kom að samskipti og samstarf milli leikskólanna hefur aukist mikið.

Fyrir fundinum lágu upplýsingar til kynningar um skipan í starfshópinn, erindisbréf og aðgerðaáætlun.
Kynnt voru tilboð frá þremur aðilum um ráðgjöf við sameiningarferli leikskólanna.

Farið var yfir fundargerðir af fundum no. 43, 44 og 45. Fræðslu- og tómstundanefnd hvetur bæjarráð til þess að greina kostnað við verkefnið Heilsueflandi samfélag og ákveða í framhaldinu hvort sækja eigi um aðild að því.

Fyrir fundinum lágu reglur um útleigu og uppfærð gjaldskrá. Umræður sköpuðust um viðmið og forsendur fyrir gjaldskránni og um gjaldtöku fyrir gistingu íþrótta- og tómstundahópa barna í skólastofum sveitarfélagins. Starfsmönnum falið að yfirfara og uppfæra gjaldskrána.

Farið var yfir gjaldskrár í skólum sveitarfélagsins og var nefndin sammála um að hækka ekki fæði í skólum á Höfn þar sem kostnaðarþátttaka foreldra stendur undir hráefniskostnaði. Starfsmanni falið að athuga með kostnað í grunnskólanum í Hofgarði. Uppfæra þarf gjaldskrá Tónskólans ogleggja aftur fyrir nefndina.

Farð var yfir tilnefningar til aðal- og varamanna í ungmennaráð. Fræðslu- og tómstundanefnd samþykkir framlagða tillögu af fulltrúum nefndarinnar.

Auglýst hefur verið eftir dagforeldrum fyrir börn í Suðursveit. Engin fyrirspurn um daggæslu í Suðursveit hefur borist. Ákveðið að auglýsa aftur.

Auglýst hefur verið eftir dagforeldrum fyrir börn í Öræfum. Ein fyrirspurn hefur borist vegna daggæslu í Öræfum sem leiddi til viðræðna um húsnæði og fyrirkomulag daggæslu en viðkomandi vildi þó ekki taka verkefnið að sér er til kom. Ákveðið að auglýsa aftur.