Fræðslu- og tómstundanefnd

Sundiðkendur fá aðgang að sundlaug innifalið í æfingagjöldum til deildarinnar en eðlilegt er að þeir greiði fyrir aðgang utan æfingatíma eins og aðrir íbúar og iðkendur annarra greina innan Umf. Sindra og USÚ. Í samningi sveitarfélagsins og Umf. Sindra er ákveðin upphæð ætluð til þess að útdeila sundkortum (afsláttarkortum) til félagsmanna. Eðlilegt er að stjórn sunddeildarinnar nýti þessi sundkort m.a. fyrir þjálfara í samstarfi við stjórn og framkvæmdastjóra Umf. Sindra.

Fræðslu- og tómstundanefnd leggur ekki til að farið verði í að gera svampgryfju í Mánagarði þar sem það er dýr framkvæmd, engin framtíðarlausn og uppfyllir ekki öryggiskröfur, auk þess sem slíkar breytingarnar myndu raska annarri nýtingu hússins.

Rætt var um upplýsingar sem fram komu í ítarlegri skýrslu vegna tilboða í parketgólf á íþróttahúsið á Höfn. Gunnar Ingi upplýsti að enn læki inn um stóru dyrnar á austurenda íþróttahússins og að gera þurfi bragarbót á því samhliða lagningu nýs gólfs, ennfremur þyrfti að kaupa rakastýringakerfi sem stuðlar að betra viðhaldi og endingu gólfsins. Gunnar Ingi og Hjálmar leggja til að gengið verði að tilboði 1 frá Sporttækjum. Málinu vísað til afgreiðslu í bæjarráði.

Rætt var um aðgang framhaldsskólanema 16-18 ára, búsettum í sveitum að skólaakstri. Fræðslu- og tómstundanefnd felur starfsmanni að skoða möguleika á að bjóða þessum hópi far með skólabílum gegn vægu gjaldi. Ennfremur var rætt um samfélagsleg áhrif þess að seinka skólabyrjun um 30-50 mínútur. Fræðslu- og tómstundanefnd felur starfsmanni að kanna viðhorf skólasamfélagsins til þess að seinka daglegri skólabyrjun til kl. 9:00. Starfsmanni er einnig falið að ræða við forsvarsmenn Fallastakks um akstursáætlun skólabíla fyrir næsta skólaár í samræmi við breytingar á nemendaskrá.

Fræðslu- og tómstundanefnd lýsir ánægju með markvissa stefnu HSU á Hornafirði þar sem áhersla er lögð á að styrkja og efla faglegt starf í þágu lýðheilsu starfsmanna og íbúa sveitarfélagins m.a. með öflugri símenntun, stuðningi við mentora og í þróun tækninýjunga bæði stað- og fjarlækninga.