Allir hafa tilkynningaskyldu samkvæmt barnaverndarlögum og hún skiptir miklu máli fyrir velferð barna. Óska má eftir því að tilkynning sé undir nafnleynd gagnvart þeim sem verið er að tilkynna. Mikilvægt er að tilkynna til barnaverndar ef áhyggjur eru af aðstæðum barns. Tilkynna þarf um bágan aðbúnað barns, óviðeigandi uppeldisaðstæður og um áhættuhegðun. Einnig er mikilvægt að tilkynna ef áhyggjur eru af því að lífi ófædds barns sé stofnað í hættu með líferni barnshafandi konu.
Einnig er hægt er að senda tilkynningu til barnaverndar á netfangið barnavernd@hornafjordur.is eða hringja í síma 470-8000 á opnunartíma Bæjarskrifstofu Sveitarfélagsins Hornafjarðar.
Utan opnunartíma, á kvöldin og um helgar, er hægt að fá samband við bakvakt barnaverndar í gegnum Neyðarlínuna 112.
Líta þarf á tilkynningu til barnaverndar sem beiðni um stuðning og aðstoð fyrir barnið og fjölskyldu þess. Starfsfólk barnaverndar leggur áherslu á samstarf við börn og forráðamenn við vinnslu mála og nærgætni og virðingar er gætt í samskiptum við alla. Fyllsta trúnaðar er heitið
Sveitarfélagið Hornafjörður og Fjarðarbyggð hafa gert með sér samningum um rekstur sameiginlegrar barnaverndarþjónustu sem nefnist Barnaverndarþjónusta Fjarðabyggðar og Sveitarfélagsins Hornafjarðar.
Starfsmenn barnaverndar vinna samkvæmt barnaverndarlögum nr. 80/2002. Markmið: Að tryggja að börn í óviðunandi aðstæðum eða með áhættuhegðun fái nauðsynlega aðstoð.
Ferlið:
Tilkynning berst um vanrækslu, ofbeldi eða áhættuhegðun barns.
Starfsmenn meta hvort hefja eigi könnun málsins.
Forráðarmenn eru upplýstir um að tilkynning hafi borist.
Tilkynnandi fær staðfestingu um móttöku og upplýsingar um málsmeðferð.
Við vinnslu barnaverndarmála er megin áhersla lögð á aðstæður og líðan barna, að talað sé við börnin og að þau fái að koma sjónarmiðum sínum og skoðunum á framfæri. Áhersla er jafnframt lögð á samvinnu við forráðarmenn og samstarf er haft við aðrar fagstéttir sem koma að málefnum barna þegar það á við. Fyllsta trúnaðar er gætt við vinnslu barnaverndarmála.
Samkvæmt 85. gr. barnaverndarlaga nr. 80/2002 skulu barnaverndarnefndir hafa tiltækar stuðningsfjölskyldur.
Markmið stuðningsins er að tryggja öryggi barna, létta álagi af börnum og fjölskyldum þeirra og styðja forráðarmenn í uppeldishlutverkinu.
Úrræðið persónulegur ráðgjafi er veitt samkvæmt barnaverndarlögum.
Persónulegir ráðgjafar hafa það hlutverk að styrkja barn félagslega og tilfinningalega í tengslum við tómstundir, menntun og vinnu. Verkefni persónulegra ráðgjafa eru því fjölbreytt. Lögð er áhersla á að samband persónulegs ráðgjafa og barns byggist á gagnkvæmu trausti og vinsemd.
Starfsmenn í tilsjón eru ráðnir á vegum barnaverndar samkvæmt barnaverndarlögum til að aðstoða fjölskyldur inni á heimilum þeirra.
Stuðningurinn er margþættur en felst oftast í uppeldisráðgjöf, samstarfi við stofnanir sem fjölskyldan er í tengslum við og aðstoð við skipulag heimilisins.
Stuðningsteymi starfa samkvæmt 2. gr. laga 86/2021 um samþættingu þjónustu í þágu farsældar barna.
Teymið er vettvangur þar sem þjónustuveitendur og eftir atvikum þeir sem veita tilteknu barni almenna þjónustu eiga samstarf um samþættingu þjónustunnar. Stuðningsteymi gerir stuðningsáætlun og fylgir henni eftir. Aðilar að stuðningsteymi geta t.d. verið skóli, barnavernd og heilsugæsla.
