Fara í efni

Félagsleg úrræði

Markmið félagsþjónustu á vegum sveitarfélaga er að tryggja fjárhagslegt og félagslegt öryggi og stuðla að velferð íbúa á grundvelli samhjálpar.

Við framkvæmd félagsþjónustunnar skal þess gætt að hvetja einstaklinginn til ábyrgðar á sjálfum sér og öðrum, virða sjálfsákvörðunarrétt hans og styrkja hann til sjálfshjálpar. Um leið skulu við framkvæmd félagsþjónustunnar sköpuð skilyrði til að einstaklingurinn geti tekið virkan þátt í samfélaginu á eigin forsendum. Félagsleg þjónusta skal í heild sinni miða að valdeflingu og miðast við einstaklingsbundnar þarfir og aðstæður.

Markmið félagslegrar ráðgjafar er að hjálpa fólki til sjálfshjálpar þannig að sérhver einstaklingur geti sem best notið sín í samfélaginu.

Félagsleg ráðgjöf tekur meðal annars til ráðgjafar vegna atvinnuleysis, veikinda, húsnæðisleysis, fjárhagsvanda, fötlunar, öldrunar, fjölmenningarmála, málefna barna og ungmenna, fjölskylduvanda og áfengis- og vímuefnavanda.

Sækja skal um félagslega ráðgjöf á íbúagátt sveitarfélagsins, nánari upplýsingar veitir starfsfólk fjölskyldu- og félagsþjónustu sveitarfélagsins á netfanginu velferd@hornafjordur.is eða í síma 470-8000.

Sveitarfélaginu er skylt að veita fjárhagsaðstoð til framfærslu einstaklinga og fjölskyldna sem ekki geta séð sér og sínum farborða án aðstoðar. 

Rétt á fjárhagsaðstoð eiga þeir sem lögheimili eiga í Sveitarfélaginu Hornafirði og hafa tekjur undir ákveðnum viðmiðunarmörkum sbr. reglur sveitarfélagsins um fjárhagsaðstoð.

Fjárhagsaðstoð getur verið í formi láns eða styrks. Fjárhagsaðstoð er veitt í tengslum við félagslega ráðgjöf og önnur úrræði eftir því sem við á hverju sinni, t.d. virka atvinnuleit, endurhæfingu eða annars konar meðferð og er markmiðið ávallt að hjálpa einstaklingum til sjálfshjálpar.

Starfsfólk fjölskyldu- og félagsþjónustu metur þörfina og ákveður fjárhagsaðstoð til einstaklinga í samræmi við reglur sveitarfélagsins. Við útreikning fjárhagsaðstoðar koma allar tekjur til frádráttar.

Fjárhagsaðstoð telst til skattskyldra tekna og geta umsækjendur nýtt sér skattkortið sitt við umsóknina. Sækja skal um fjárhagsaðstoð á íbúagátt sveitarfélagsins, nánari upplýsingar veitir starfsfólk fjölskyldu- og félagsþjónustu sveitarfélagsins á netfanginu velferd@hornafjordur.is eða í síma 470-8000.